علي ماهر يتحدى الأهلي في السوبر: «مش شايفين غير المكسب» - الأول نيوز

تحدث علي ماهر المدير الفني لفريق سيراميكا كليوباترا، عن آخر الاستعدادات لخوض المباراة المرتقبة أمام الأهلي، المقرر إقامتها في الخامسة مساء غد الخميس، ضمن منافسات نصف نهائي كأس السوبر المصري.

علي ماهر: اللاعيبة كلها على أتم الاستعداد للسوبر

قال علي ماهر في المؤتمر الخاص بمباراة الأهلي: «مبدئيًا مبسوط بالاستقبال في الإمارات ومبسوطين إن السوبر في الإمارات، وبنشكر دولة الإمارات الشقيقة، واللاعيبة كلها على أتم الاستعداد لخوض بطولة كأس السوبر المصري، وإن شاء الله تبقى بطولة جميلة وكل الناس تبقى مبسوطة».

وأضاف: «عندنا طموح كبير زي النادي الأهلي، وكل الفرق بتجتهد عشان تاخد البطولة، والنادي الأهلي نادي كبير، لكن إن شاء الله السنة دي تكون مختلفة، واللاعيبة في حالة فنية هايلة، وبقوا عارفين إزاي يلاعبوا الفرق الكبيرة، إحنا مش شايفين حاجة قدامنا غير إننا نكسب الماتش، وإن شاء الله ربنا يكرم ونقدر نكسب».

وأردف علي ماهر: «عندنا لاعيبة كبيرة متعودة على الضغوطات وشخصية الفريق اتغيرت تمامًا، والكل بيفكر إزاي نكسب بس، وده مش سهل وبيحتاج لمجهود كبير، المباراة اللي فاتت رجعنا للمباراة، بعد ماكنا خسرانين لحد الدقيقة 90 ودي حاجة مش سهلة».

علي ماهر يكشف موقف سعد سمير والدبيس من مباراة الأهلي

وأوضح علي ماهر: «سعد سمير حالته كويسة، وأصبح جاهز لخوض المباراة، لكن كريم الدبيس لسه محتاج بعض الوقت وممكن يبقى موجود معانا في المباراة التانية، لكن بشكل عام الفرقة كلها جاهزة إن شاء الله، لخوض مباراة الأهلي».

وأشار المدير الفني لسيراميكا: «اللاعيبة كلها مبسوطة بحالة النجاح اللي إحنا فيه، ودايما اللي جاي بيكون صعب، حاجة مش سهلة إنك تكسب 5 مباريات ورا بعض، مهم أوي إنك تقدم كورة ممتعة مع النتائج».

وأتم: «الإدارة مبتخليش لأي حد طلب غير لما بتلبيه، الكل عاوز يشتغل، لكن نقطة الانطلاق دائمًا عند المدير الفني، وعندنا أمل في ربنا إن شاء الله إنه يكرمنا ونفوز».