حازم إمام عن وفاة محمد صبري: «أتمنى اللي حصل يخلي جمهور الكورة يتعظ شوية» - الأول نيوز

علق حازم إمام، نجم نادي الزمالك السابق، على وفاة زميله محمد صبري، أحد أساطير القلعة البيضاء، بعد حادث أليم بطريق التجمع الخامس.

وقال حازم إمام، خلال مداخلة تلفزيونية: «البقاء لله لنا ولكل المصريين، والله ربنا يرحمه ويغفر له، صدمة طبعا، وكل شيء بيد ربنا، وكلنا راضون بقضاء الله، لكن الصدمة إن صبري كان لسه امبارح بيكلمنا وكلنا شايفينه بصحة كويسة.. ربنا يا رب يصبّر أهله وبناته وزوجته وعيلته ويصبّرنا جميعا، إحنا أصحابه واحنا جيل كبير عشناه مع بعض أكتر ما عشناه في بيوتنا».

حازم إمام: صبري كان في جيلنا رقم واحد

وأكد «إمام»: «محمد صبري واحد من أهم اللاعبين اللي جم نادي الزمالك، ومن أحرف اللاعبين، وكان في جيلنا هو رقم واحد، كلنا كنا بنقول ده هيبقى حاجة كبيرة جدا جدا، وهو فعلا حاجة كبيرة، لكنه مخدش حقه من الصحافة والإعلام، ومقعدش كتير، صبري اتوقف ودخل في شوية مشاكل هو مش سببها، اتفرضت عليه بسبب روحه وغيرته على النادي دايمًا».

وأضاف: «شخصية جميلة جدا، طيب جدا، ولذيذ جدا.. صبري كان دايمًا في المنتخب أخف دم في العالم، وكان معروف إن تجمعنا كله بيبقى عنده في الأوضة، وبنقعد ورا في الأوتوبيس مع بعض نهزر ونضحك، وللأسف أنا لسه بره مصر عندي شغل، ومش هعرف أرجع دلوقتي.. عرفت الخبر النهارده الصبح، وجمال حمزة كلمني».

حازم إمام: الكلام اللي مش بيقدم ولا يأخر

وأردف حازم إمام: «إحنا بنتكلم دايما عن الزمالك والأهلي، والكلام اللي مش بيقدم ولا يأخر، لكن للأسف الناس مبتشوفش قيمة الموضوع غير لما حد يتوفّى، يقولوا بعدها (الكورة مش مستاهلة)، وبعد يومين نرجع نشتم بعض تاني، وندخل في نفس الدائرة».

وشدد على أن «السوشيال ميديا ليها فوائد، لكن ليها عيوب خطيرة جدا، أنت يا بني آدم بتشوف شتيمتك بعينك، وتشوف الناس بتتكلم عليك بشكل وحش، زمان مكناش بنشوف ده، لكن دلوقتي أي كلمة تقولها عن الزمالك أو الأهلي، الناس اللي ضدك تشتمك وتقلل منك، والحاجات دي بتحبط الواحد نفسيا، وبتضايقه جدا، وأتمنى اللي حصل النهارده يخلي الناس تتعظ شوية، وتخلّي النقد باحترام، ويخلّي اختلاف الآراء ميفسدش للود قضية.. في الآخر إحنا بنتكلم في الكورة».

وتابع حازم إمام: «كلنا بنحب صبري، والناس كلها بتحبه، شخصية جميلة، وعمره ما عمل حاجة وحشة، وكان دايما قلبه أبيض وبيحب الخير لزمايله».