«استحملنا كتير».. عماد النحاس يخرج عن صمته بعد الفوز على الزمالك.. ماذا قال؟ - الأول نيوز

عبر عماد النحاس، المدير الفني للنادي الأهلي، عن سعادته بالفوز الذي حققه فريقه اليوم الإثنين، على حساب الزمالك، بنتيجة 2-1، في اللقاء الذي جمع الجانبين مساء اليوم الاثنين، لحساب الجولة التاسعة من بطولة الدوري المصري.

وقال عماد النحاس، في تصريحات خلال المؤتمر الصحفي الذي أعقب لقاء القمة: «مبروك للأهلي وجماهيره واللاعبين.. كل الناس استحملت كتير».

وأضاف: «أقدر أقول الحمد لله إننا نجحنا في تحقيق المكسب والفوز، رغم بداية الزمالك، والفرصتين اللي أهدرهم الزمالك».

وتابع مدرب الأهلي: «اتحسبلنا ركلة جزاء من نفس اللعبة، واتكلمنا مع اللاعبين إزاي نرجع للمباراة، ونجحنا في صناعة أكثر من فرصة، ولعبنا كرة قدم بهدوء».

عماد النحاس: الفوز بيداري حاجات كتير

وأكد عماد النحاس: «الفوز بيداري حاجات كتير، وأول مرة بالنسبة لي إني أدير مباراة قمة، بقول للزمالك هارد لك».

وشدد على أن «الفوز في المباريات اللي زي دي بيجي من التفاصيل الصغيرة، وبشكر اللاعبين على المجهود اللي اتبذل، واللاعبين قعدت أكتر من مرة مع بعض، وتعاهدوا على الفوز».

وأكد عماد النحاس: «المباراة دي بداية جديدة لينا، ولو شريف مسجلش فهو صنع.. لو التوفيق مش معاك حاول، وشريف كان عنده إحساس إنه هيجيب جول، لكن عمل مجهود كبير».

وأوضح المدرب: «الماتش اللي فات اتكلمت على جراديشار إنه مصاب، رغم استغراب الجماهير من استبداله، وزي ما قولت الفوز بيخلي الجماهير متتكلمش في تبديلات، ومفيش حاجة بنسيبها للظروف واتكلمنا كتير على ده».

عماد النحاس: بشكر كل الجهاز الفني على الفوز

وأضاف عماد النحاس: «بشكر كل الجهاز الفني على الفوز، وعبد الرحمن عيسى، مخطط أحمال الفريق، قدر أنه يحط إيده على كل تفاصيل الحالة البدنية للاعبين، ونجح في رفع الكفاءة والقدرات البدنية لجميع اللاعبين بشكل رائع».

وتابع: «ده كان أفضل ماتش لينا الموسم ده، لكن هنفضل نتكلم مع اللاعبين على الأخطاء، لأنه غاب عننا التركيز بداية المباراة».